Hrunið : Yfirlit greina
Barnið óx en brókin ekki
Íslenska bankakerfið hrundi í mestu fjármálakreppu sem gengið hefur yfir heiminn í nærri áttatíu ár. Hinir alþjóðlegu íslensku bankarnir voru orðnir of stórir fyrir þær íslensku undirstöður sem þeir stóðu á og því fékkst ekki við aðstæður ráðið á haustdögum 2008. Barnið hafði vaxið en brókin ekki stækkað.
Útrásin var einstefna
Hugmyndir margra Íslendinga um útrás virtust byggja á þeim misskilningi að alþjóðavæðing viðskiptalífsins snérist um það eitt að þiggja en aldrei að láta neitt af hendi. Íslensku bankarnir tóku lán í útlöndum sem þeir lánuðu áfram til íslenskra fyrirtækja sem keyptu eignir í útlöndum og veðsettu þær. Erfitt var í mörgum tilfellum að sjá virðisaukandi framlag Íslendinga. Björgólfur Thor gerði strax árið 2005 athugasemdir við þennan hugsunarhátt í ræðu þar sem hann sagðist vera frekar í innrás en útrás því hann hefði fjárfest hér á landi með fjármunum sem hann aflaði erlendis.